Şəki rayonu Çayqaraqoyunlu kənd sakini Zənfirə Sirəfilovanın ağır görmə qüsuru olan oğlunun hərbi xidmətə aparılması cəhdi ilə bağlı şikayəti öz nəticəsini verib.
Modern.az-ın məlumatına görə, Səfərbərlik və Hərbi Xidmətə Çağırış üzrə Dövlət Xidmətinin (SHÇDX) Şəki Şəhər Şöbəsində çağırışçı qəbul edilərək təkrar müayinəyə göndərilib.
Zənfirə Sirəfilovanın sözlərinə görə, övladı Dəyanət Sirəfilovun anadangəlmə göz zəifliyi və göz kökündə ağrılar səbəbləri nəzərə alınmadan qanunazidd olaraq hərbi xidmətə göndərilməsi haqqında əsassız qərar verilmişdi. Artıq Səfərbərlik və Hərbi Xidmətə Çağırış üzrə Dövlət Xidmətinin Mərkəzi həkim komissiyası tərəfindən qərar ləğv olunub.
Xatırladaq ki, qadın bir müddət əvvəl 2007-ci il təvəllüdlü Dəyanət Sirəfilovun anadangəlmə ağır dərəcəli görmə zəifliyindən əziyyət çəkməsinə, bütün tibbi sənədlərin SHÇDX Şəki Şəhər Şöbəsində olmasına baxmayaraq, qurumun əməkdaşları tərəfindən ailəyə təzyiq göstərildiyini deyib. 6 aylıq süründürməçilikdən sonra, yanvarın 7-də xəstə gəncin hərbi xidmətə aparılacağı bildirilib. Bu müddət ərzində gəncin təhsil aldığı kollecdə dərslərindən geri qaldığı və imtahanlarda iştirak edə bilmədiyi qeyd olunur.
Məsələ ictimailəşdikdən sonra Zenfira Sirəfilova SHÇDX Şəki Şəhər Şöbəsinin rəisi polkovnik-leytenant Qaraş Abbasov tərəfindən qəbul olunub və yanvarın 8-də səhər saatlarında Dəyanət Sirəfilov qurum nümayəndələrinin müşayiəti ilə Bakıya - Mərkəzi Hərbi Həkim Komissiyasına təkrar müayinə üçün göndərilib.
