Şəki rayonunun Çayqaraqoyunlu kənd sakini, təqaüdçü Zənfirə Sirəfilova anadangəlmə ağır dərəcəli görmə zəifliyi olan oğlunun hərbi xidmətə çağırıldığına görə olan şikayət öz nəticəsini verməkdədir.
Modern.az-ın məlumatına görə, Səfərbərlik və Hərbi Xidmətə Çağırış üzrə Dövlət Xidmətinin (SHÇDX) Şəki Şəhər Şöbəsi vətəndaşı qəbul edərək çağırışçını təkrar müayinəyə göndərib.
Zənfirə Sirəfilovanın sözlərinə görə, 2007-ci il təvəllüdlü oğlu Dəyanət Sirəfilov anadangəlmə ağır dərəcəli görmə zəifliyindən əziyyət çəkir. Bütün tibbi sənədlər SHÇDX Şəki Şəhər Şöbəsində olsa da, qurumun əməkdaşları tərəfindən ailəyə təzyiq göstərilib. 6 aylıq süründürməçilikdən sonra, yanvarın 7-də xəstə gəncin hərbi xidmətə aparılacağı bildirilib. Bu müddət ərzində gəncin təhsil aldığı kollecdə dərslərindən geri qaldığı və imtahanlarda iştirak edə bilmədiyi qeyd olunur.
Məsələ ictimailəşdikdən sonra yanvarın 6-da Zenfira Sirəfilova SHÇDX Şəki Şəhər Şöbəsinin rəisi polkovnik-leytenant Qaraş Abbasov tərəfindən qəbul olunub.
Xanımın sözlərinə görə, yanvarın 8-də səhər saatlarında Dəyanət Sirəfilov komissarlıq nümayəndələrinin müşayiəti ilə Bakıya - Mərkəzi Hərbi Həkim Komissiyasına təkrar müayinə üçün gətirilib. Şikayətçi ana qeyd edir ki, yerli şöbə müayinənin ixtisaslaşmış Zərifə Əliyeva adına Oftalmologiya İnstitutunda keçirilməsinə razı olmayıb.
Hazırda ailə Səfərbərlik və Hərbi Xidmətə Çağırış üzrə Dövlət Xidmətinin rəhbərliyindən və hüquq-mühafizə orqanlarından məsələyə tam obyektiv yanaşılmasını gözləyir. Z.Sirəfilova vurğulayır ki, əgər rayon xəstəxanasının illərdir qeydə aldığı diaqnozlar "yox sayılarsa", o, hüquqlarını məhkəmə müstəvisində sonadək müdafiə edəcək.
