İsmayıllıda ailə mübahisəsi cinayət işi ilə nəticələnib.
Shimal.News-un əldə etdiyi məlumata görə, Qurbanəfəndi kəndində 18 yanvar 2025-ci il tarixində ailə mübahisəsi baş verib.
Kənd sakini Rəşad M. yaşadığı evin həyətyanı sahəsində yerləşən tövlədə həyat yoldaşı Aysel M. ilə şəxsi münasibətlər zəminində yaranan mübahisə zamanı ona fiziki zorakılıq tətbiq edib. Nəticədə qadın baş-beyin silkələnməsi və müxtəlif nahiyələrdə xəsarətlər alıb.
Faktla bağlı Rəşad M. barəsində Azərbaycan Respublikası Cinayət Məcəlləsinin 128-ci maddəsi (qəsdən sağlamlığa yüngül zərərvurma) ilə ittiham irəli sürülüb.
Təqsirləndirilən şəxs özünü təqsirli bilməyib. O, ifadəsində göstərib ki, 3 övladı var. Aysel ilə aralarında mütəmadi olaraq ailə məişət zəminində mübahisələr baş verib:
"Həmin gün oğlum Elvinlə birlikdə üç baş dovşanı kisənin içində yaşadığım evə gətirdim. Oğlum içində dovşanlar olan kisəni tövləyə apardı. Həmin vaxt arvadım inəkləri sağmaq üçün tövləyə getdi. Mal-qaranın dovşanlardan hürkməsinə görə Aysel inəkləri sağa bilməməsini əsas gətirdi və mənimlə mübahisə etməyə başladı. Ayseli sakitləşdirmək məqsədi ilə ona yaxınlaşdım. Bu zaman o, başını tövlənin divarına çırpdı. Daha sonra özünü yerə yıxdı, yerə yıxıldıqdan sonra başını yerə vuraraq özünə xəsarət yetirdi. Mən Ayselə bildirdim ki, sakit olsun və özünü ələ alsın. Amma o, sözlərimə məhəl qoymadı. Sonra tövlədən bayıra çıxdı və evi tərk edərək getdi".
İş üzrə zərərçəkmiş Aysel isə hadisəni başqa cür təsvir edib:
"Dovşanların səsindən inəkləri sağa bilmədim. Rəşaddan dovşanları tövlədən çıxarmasını xahiş etdim. Amma o, hirsləndi və saçımdan tutaraq başımı tövlənin divarına vurdu. Bundan sonra məni tövlənin içərisində sürüməyə başladı".
İsmayıllı Rayon Məhkəməsinin hökmü ilə Rəşad 6 ay müddətə azadlığın məhdudlaşdırılması cəzasına məhkum edilib. Onun üzərinə elekton qolbaq taxılıb.
Təqsirləndirilən şəxsə cəza çəkdiyi müddətdə hər gün saat 23:00-dan növbəti gün saat 07:00-a dək yaşadığı evi tərk etməsi, bu müddətdə İsmayıllı rayonu ərazisini tərk etməsi qadağan olunub.
