Şabranın Dəvəçi kəndində uzun müddətdir davam edən kanalizasiya problemi sakinlərin həyatını çətinləşdirib.
Məsləni Shimal.News-a danışan sakinlər bildiriblər ki, Hüseyn Nağıyev küçəsində kanalizasiya xətlərinin çirkab suları daşaraq fərdi yaşayış evlərinin həyətlərinə axır, küçə isə faktiki olaraq kanalizasiya gölünə çevrilib.
"Kimə müraciət edəcəyimizi bilmirik. Səsimizi eşidən yoxdur. Son ümidimiz mediadır", – deyə sakinlər qeyd edirlər.
Bu problem illərdir mövcuddur. Şabran Rayon İcra Hakimiyyətinə, eləcə də su-kanalizasiya xidmətinə dəfələrlə olunan müraciətlər həllini tapmır.
Şikayətlər əsasında əraziyə göndərilən nümayəndələr həyətlərə baxış keçirmək üçün uzunboğaz çəkmələr qeyinməli olurlar. Lakin bundan sonra belə heç bir tədbir görülmür.
Mövcud vəziyyət xüsusilə sanitar-gigiyenik baxımdan ciddi təhlükə yaradır. Həyətlərdə yığılan çirkab sular yoluxucu xəstəliklərin yayılması riskini artırır. Sakinlərdən birinin onkoloji xəstəlikdən əziyyət çəkməsi isə problemin nə qədər həssas və təcili olduğunu bir daha ortaya qoyur.
Sakinlər problemin ictimailəşdirilməsini və məsul qurumların məsələyə təcili və ciddi şəkildə müdaxilə edərək kanalizasiya problemini kökündən həll etməsini tələb edirlər.
