Dünya şöhrətli aktyor Ceki Çanın rol aldığı "Tanrının Zirehi 4: Ultimatum" (Armour of God 4: Ultimatum) filmi üçün Azərbaycanda kastinq elan olunub. Layihənin bəzi səhnələri hazırda Bakıda çəkilir və aktyorun təxminən 10 gün ölkəmizdə olacağı bildirilir.
Shimal.News xəbər verir ki, kastinqdə Asiya və slavyan görünüşlü qadın və kişilər iştirak edə bilərlər. Seçimdən uğurla keçən namizədlər Ceki Çanın yer aldığı beynəlxalq film layihəsinin kütləvi səhnələrində çəkilmək imkanı əldə edəcəklər.
Bu kastinq xüsusilə Şimal bölgəsinin istedadları üçün də maraqlı fürsət hesab olunur. Quba, Qusar, Xaçmaz, Şəki, Qax, Zaqatala, Balakən, Oğuz, Qəbələ və İsmayıllı kimi rayonlardan olan insanlar illərdir Azərbaycan kino və teatrında öz aktyorluq məharəti, səhnə mədəniyyəti və fərqli ləhcələri ilə seçiliblər. Bölgədən yetişən bir çox sənət adamı milli kino və televiziya tarixində yaddaqalan obrazlar yaradıb.
Beynəlxalq film layihəsində yer almaq isə gənclər üçün həm yeni təcrübə qazanmaq, həm də dünya kino sənayesinə ilk addımı atmaq baxımından əhəmiyyətli imkan ola bilər.
Kastinqdə iştirak etmək istəyən şəxslər +994 55 563 14 64 nömrəsi ilə əlaqə saxlaya bilərlər.
