Bakının Xətai rayonunda yerləşən Heydər Əliyev adına istirahət parkının amfiteatr səhnəsində ənənəvi III Kəlağayı Festivalı keçirilib.
Shimal.News xəbər verir ki, festival Azərbaycan Respublikasının İnsan Hüquqları üzrə Müvəkkili (Ombudsman) Aparatı, Bakı Şəhər Mədəniyyət Baş İdarəsi, Xətai Rayon İcra Hakimiyyəti, Qərbi Azərbaycan İcmasının Xətai rayonu üzrə nümayəndəliyi, "Mirvarid Dilbazi Poeziya Məclisi" İctimai Birliyi və "Kəlağayı ev-muzeyi"nin birgə təşkilatçılığı ilə baş tutub.
Artıq ənənəyə çevrilən festivalın əsas məqsədi Azərbaycan xalq tətbiqi sənətinin nadir nümunələrindən olan milli kəlağayı sənətinin təbliği, qorunması və gələcək nəsillərə ötürülməsidir. Bu il tədbir "Şəhərsalma və Memarlıq İli" çərçivəsində təşkil olunaraq milli irsin şəhər mədəniyyəti ilə vəhdətini nümayiş etdirib.
Festival çərçivəsində qədim kəlağayı nümunələri, milli baş geyimləri, xalçaçılıq nümunələri və dekorativ-tətbiqi sənət əsərlərindən ibarət sərgi təşkil olunub. İştirakçılar rəssam Gülnarə Məmmədovanın əsərləri və sənətkar Güllü Eldar Tomarlının əl işləri ilə də tanış olublar.
Tədbirdə İsmayıllı rayonunun Basqal qəsəbəsi və Şəki bölgəsinin ustaları tərəfindən hazırlanan müxtəlif çeşidli kəlağayılar xüsusi maraqla qarşılanıb. Festival iştirakçıları milli sənət nümunələrini yaxından izləmək və əldə etmək imkanı qazanıblar.
Festival çərçivəsində "Susmayan həqiqətlər: Deportasiya, soyqırımı, etnik təmizləmə" mövzusunda sərgi də təqdim olunub. Sərgidə Qərbi azərbaycanlıların geyim mədəniyyətini və kəlağayı ənənələrini əks etdirən fotolar və arxiv sənədləri nümayiş etdirilib.
Rəsmi hissədə Azərbaycanın ərazi bütövlüyü uğrunda şəhid olanların xatirəsi yad edilib, Dövlət Himni səsləndirilib.
Tədbirdə Xətai Rayon İcra Hakimiyyətinin başçısı Rafiq Quluyev, Milli Məclisin deputatları, ictimai xadimlər, şəhid ailələri, qazilər və çoxsaylı mədəniyyət nümayəndələri iştirak ediblər.
Festivalın bədii hissəsində aşıq sənəti, muğam, xalq mahnıları və milli rəqs nümunələri təqdim olunub. Müxtəlif folklor kollektivləri və sənətçilərin çıxışları tədbir iştirakçıları tərəfindən maraqla qarşılanıb.
Təşkilatçılar bildiriblər ki, festivalın əsas məqsədi milli-mənəvi dəyərlərin qorunması, Azərbaycan mədəniyyətinin zənginliyinin təbliği və kəlağayı sənətinin yaşadılmasıdır.
