Böyük Qafqazın ətəklərində, dumanlı dağların qoynunda yerləşən İsmayıllı rayonu bir çox qəhrəmanlar böyüdüb, amma Saməddinin hekayəsi bir başqadır. Yaxınlarının dediyinə görə, o, çox sakit, məsuliyyətli və insanlara kömək etməyi sevən biri olub. Hələ məktəb illərindən həkim olmaq arzusu qururdu. Bu arzu təsadüfi deyildi, Saməddin insan həyatını xilas etməyi özünə məqsəd seçmişdi. Məktəbi bitirdikdən sonra Azərbaycan Tibb Universitetinin Hərbi Tibb Fakültəsinə qəbul oldu və "Hərbi feldşer işi" ixtisasını seçdi. Bu seçim onun həyat yolunu tamamilə müəyyənləşdirdi. O, həm hərbçi, həm də həyat xilas edən tibb işçisi olacaqdı.
Saməddin xidmət dövründə gizir feldşer kimi fəaliyyət göstərirdi. Döyüş yoldaşlarının dediyinə görə, o, ən təhlükəli anlarda belə geri çəkilməyi sevmirdi. Yaralı əsgər varsa, Saməddin mütləq ora gedirdi.
Ən diqqətçəkən məqamlardan biri onun 2016-cı ilin Aprel döyüşləri zamanı göstərdiyi qəhrəmanlıq idi. Rəsmi məlumatlara görə, Saməddin həmin döyüşlərdə 130 yaralını ölümün əlindən alaraq döyüş meydanından çıxarıb. Daha sonra 2020-ci ilin Tovuz hadisələri zamanı onlarla hərbçini xilas edib.
Onun haqqında danışan hərbçi yoldaşları deyirmiş ki, Saməddin yaralı əsgərlərə tibbi yardım göstərərkən əvvəlcə onların psixoloji durumunu düzəltməyə çalışardı. "Sən döz, səni buradan çıxaracağıq" sözünü tez-tez deyərmiş.
Yaxınlarının danışdığı başqa bir maraqlı detal isə budur ki, Saməddin evə gələndə müharibədən, gördüyü ağır mənzərələrdən demək olar danışmazdı. Ailəsini narahat etməmək üçün hər şeyi içində saxlayardı. Anasına isə hər dəfə "Narahat olma, mən yaxşıyam" deyirmiş.
2020-ci il Vətən müharibəsi başlayanda Saməddin yenə ön xətdə idi. Bu dəfə də əlində silahdan çox tibbi çanta vardı. O, döyüş bölgəsində yaralı əsgərləri çıxarmaqla məşğul olurdu.
Rəsmi məlumatlara görə, Saməddin Vətən müharibəsi zamanı 90 yaralını döyüş meydanından çıxarmağa nail olub. Lakin sonuncu dəfə yaralı əsgəri təhlükəli zonadan çıxararkən snayper gülləsinə tuş gəldi və şəhid oldu.
Şəhid gizir Saməddin Qəfərov 2020-ci il sentyabrın 28-də doğulduğu İsmayıllının Qubaxəlilli kəndində dəfn edildi.
Azərbaycan dövləti onun xidmətlərini yüksək qiymətləndirdi. Ölümündən sonra Saməddin Qəfərov "Vətən uğrunda", "Cəsur döyüşçü" və "Suqovuşanın azad olunmasına görə" medalları ilə təltif olundu.
