Nabranda yerləşən “Atlant” istirahət mərkəzinin sahibi Tahir Qədəşov Bakı Ağır Cinayətlər Məhkəməsində çağırılıb.
“Musavat”ın məlumatına görə, hakim qarşısına 171 Azərbaycan vətəndaşına qarşı 14 milyon manat dələduzluqda ittiham olunan T.Qədəşovun kürəkəni Nofəl Hacıyev çıxarılıb.
Təqsirləndirilən şəxs bildirib ki, 2000-ci illərdən başlayaraq Bakıda, Sumqayıtda, Xırdalanda 100-ə yaxın hündürmərtəbəli binalar tikib və istifadəyə verilib. 2022-ci ilə qədər binaların tikintisindən əldə olunan külli miqdarda vəsaitləri qayınatasına ötürüb. Həmin vəsait “Atlant” Ailəvi İstirahət Mərkəzinin təmir-tikintisinə, genişlənməsinə yatırılıb. Bu zaman tikinti ilə bağlı kəskin maliyyə problemləri yaranıb. İş adamlarına borcları ödəmək üçün “Atlant” satışa çıxarılıb. Lakin Tahir Qədəşov son anda müştəriyə imtina edib.
Nofəl Hacıyev deyib ki, çox çətin vəziyyətdə olduğundan, yaranmış borcları ödəyə bilmədiyindən məcburiyyət qarşısında bir mənzili bir neçə nəfərə satmaqla vəziyyətdən çıxmağa çalışıb. Düşünüb ki, binanı tikib təhvil verəndən sonra əldə edəcəyi gəlirlə aldadılmış, bu gün məhkəmədə zərərçəkən statusunda olan şəxslərin pullarını qaytaracaq.
Tahir Qədəşov şahid qismində dindirilib. O, sərbəst ifadəsində dələduzluğun qeydə alındığı “Təbriz” MTK-da təsisçi olduğunu desə də, baş verənlərdən xəbərsiz olduğunu isbatlamağa çalışıb. Lakin hakimin, vəkillərin və həbsdə olan kürəkəni Nofəl Hacıyevin suallarına T.Qədəşov adekvat cavablar verməkdən yayınıb. Məsələn, o, “Atlant”a yatırılan vəsaitlərin “Təbriz” MTK-dan əldə olunub olunmaması barədə konkret cavab vermək istəməyib.
Zərərçəkənlər tələb ediblər ki, üzərinə ibtidai istintaq dövründə həbs qoyulan “Atlant” Ailəvi İstirahət Mərkəzi müsadirə olunaraq satışa çıxarılsın və onlara dəymiş ziyan ödənilsin.
“Atlant” böyük istirahət kompleksdir. Müstəqil qiymətləndiricilər onun hazırda 80-100 milyon manat bazar qiyməti olduğunu bildirirlər. İbtidai istintaq dövründə obyektin üzərinə həbs qoyulub. Proses oktyabrın 10-da davam etdiriləcək.
