Zaqatalada 33 yaşlı rayon sakini Mehdi İsrafilov (ad və soyad şərtidir) məhkəmə binasının önündə uca səslə söyüş söyüb.
Lent.az-ın məlumatına görə, bu zaman yaxınlıqda xidmətdə olan polis əməkdaşları ona irad bildiriblər. Lakin Mehdi əvvəlcə polisin qanuni tələbinə məhəl qoymayıb.
Bu əməllərinə görə, ona İnzibati Xətalar Məcəlləsinin 510-cu (xırda xuliqanlıq) və 535.1-ci (polis və hərbçinin tələbinə tabe olmamaq) maddələri ilə protokol tərtib olunub.
Təqsiriləndirilən şəxs ifadəsində bildirib ki, sözügedən əməli sərxoş halda törədib. Özü qaraciyər sirrozundan əziyyət çəkir və əməlindən peşmandır.
Rayon məhkəməsində hakim Vüqar Məmmədovun sədrliyi ilə keçirilən prosesdə Mehdi İsrafilov barəsində 200 manat inzibati cərimə cəzası təyin edilib.
