Zaqatala rayonuna yağan aramsız yağışlar nəticəsində dağ çaylarında suyun həcmi bir neçə dəfə artıb, sel bəzi təsərrüfatlara ziyan vurub.
AZƏRTAC-ın məlumatına görə, Talaçayda torpaq bəndlərin yuyulması nəticəsində rayonun Vöhtala kəndindəki təsərrüfatları, Dardoqqaz kəndi istiqamətində əraziləri su basıb.
Vöhtala kənd icra nümayəndəliyindən verilən məlumata əsasən, sel suları ümumilikdə 15 hektara yaxın fındıq və ot sahəsinə ziyan vurub. Kəndin yollarına da zərər dəyib. Bu istiqamətdə bərpa işlərinə başlanılıb.
Zaqatala Su Meliorasiya Sistemlərinin İstismarı İdarəsinin baş mühəndisi Ceyhun Mirzəyev bildirib ki, Katexdə və Muxaxçayda da qabaqlayıcı tədbirlər görülüb.
