Zaqatala rayonunda 62 yaşlı Mehdi mübahisə zamanı oğlu Murada (adlar şərtidir – red.) xəsarət yetirib.
Demokrat.az-ın məlumatınaa görə, hadisə 1 dekabr 2023-cü ildə baş verib. Mehdi həmin gün, saat 11:50-də Zaqatala şəhərində özünə məxsus “Mercedes Benz 208” markalı mikroavtobusun salonunda oğlu Murad ilə mübahisə edib. O, oğlunun sol gözaltı nahiyəsinə yumruqla bir dəfə zərbə endirərək xəsarətlər yetirib.
Hadisəni törədən Mehdinin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
Cinayət işi üzrə təqsirləndirilən şəxs qismində ifadə verən Mehdi ona elan olunmuş ittiham üzrə özünü təqsirli bilib:
“Mən 10 ildir ki, həmin mikroavtobusla Zaqatala-Balakən rayonları arasında sərnişin daşıyıram. Hazırda 60 yaşım var. Təxminən hadisədən 1 ay əvvəl olar ki, Murad məndən sürücülük peşəsindən əl çəkməyimi, sərnişin daşımamağımı tələb etdi. Həmin dövrdə təxminən 15 gün ərzində Murad mənimlə işlədi. Murad Zaqatala-Balakən rayonları arasında sərnişin daşıdığı zaman yanımda olub, mənə kömək edib.
Həmin gün Faiq Əmirov küçəsində sonuncu dayanacaqda sərnişinləri mikroavtobusdan düşürdüm. Murad həmin vaxt məndən yaşlandığım üçün sürücülük peşəsindən əl çəkməyimi, sərnişin daşımamağımı istədi. O, son ay ərzində mütəmadi olaraq məndən sürücülük peşəsindən əl çəkməyimi, sərnişin daşımamağımı istədiyi üçün həmin vaxt əsəbləşdim. Mübahisə zamanı Muradı vurdum. Həmin vaxt onun gözündə olan eynək qırıldı və şüşəsi gözaltı nahiyəsini kəsdi. Murad həmin an mikroavtobusdan düşərək qaçdı. Sonra Muradın barəmdə şikayət etdiyini bildim”.
İş üzrə zərərçəkmiş qismində ifadə verən Muradın sözlərinə görə, atasının həm yaşlı, həm də xəstə olması ilə əlaqədar sərnişin daşımamasını istəyib:
“Atam sözümdən əsəbləşərək üstümə gəldi və qəflətən yumruqla gözümə vurdu. Həmin vaxt gözümdəki eynək qırılaraq gözaltı nahiyəmi kəsdi. Əlim ilə gözümə toxunanda əlim qan oldu. Əlimdəki qanı görərək qorxdum və xəstəxanaya qaçdım. Sonra polis şöbəsinə hadisə barədə məlumat verdim. Atam ilə barışmışam, onu bağışlamışam. Atam da səhvini başa düşüb. Bir də belə hərəkət etməyəcək”.
Bu cinayət işinə Zaqatala Rayon Məhkəməsində baxılıb. Məhkəmə təqsirləndirilən şəxsin zərərçəkmişlə barışmasını, zərərçəkmiş şəxsin ondan şikayətçi olmamasını nəzərə alıb. Bu səbəbdən məhkəmə onun barəsində olan cinayət təqibinə xitam verib.
