İsmət Yusifli bu dəfə də məhkəmədən xilas ola bilmədi.
Şəki Apellyasiya Məhkəməsi bu gün dələduzluqda təqsirləndirilən İsmət Yusiflinin apellyasiya şikayətinə baxışı başa çatdırıb.
Pravda.az-ın əldə etdiyi məlumata görə, məhkəmə şikayəti təmin etməyib.
İttihama görə, İsmət Yusifli qohumu ilə birlikdə, əvvəlcədən əlbir olaraq, bir neçə şəxsi aldadıb və onların pulunu ələ keçirib. O, insanlara FHN xətti ilə evlərinin təmir ediləcəyini vəd edib, bunun müqabilində isə müxtəlif məbləğlərdə pul toplayıb.
İlk hadisə 2019-cu ildə baş verib. İsmət Yusifli Zaqatala şəhərində yaşayan bir şəxsi aldadaraq ondan 3500 manat alıb. Bir il sonra isə eyni yerdə, eyni bəhanə ilə daha 3500 manat götürüb. Beləliklə, zərərçəkmiş ümumilikdə 7 min manat ziyana düşüb.
Lakin bu son olmayıb. O, başqa bir sakini də aldadıb. Zəlzələdən zərər görmüş evinin FHN tərəfindən təmir ediləcəyini deyərək, həmin şəxsin 2021-ci ildə bank hesabına göndərdiyi 5000 manatı ələ keçirib.
Dələduzluq bununla da bitməyib. İsmət Yusifli daha bir zərərçəkmişi, qoca yaşlı qadını da eyni vədlərlə aldadıb. Onun evinin guya yenidən tikiləcəyini deyərək, müxtəlif vaxtlarda 3000 manat, sonra 500 manat, daha sonra isə "Million" terminalı vasitəsilə göndərilən 2000 manatı götürüb. Ümumilikdə həmin şəxs 5500 manat ziyana düşüb.
Bütün bu əmələ görə Zaqatala Rayon Məhkəməsi İsmət Yusiflini 2 il 5 ay 26 gün müddətinə azadlıqdan məhrum edib.
