Xaçmazın Yergüc kəndində sakinləri təəccübləndirən və bir qədər də narahat edən hadisələr baş verib. Naməlum şəxs və ya şəxslər kənddəki ev quşlarına göz dikib.
Yerli sakinlərin Shimal.News -a verdiyi məlumata görə, oğrular gecə saatlarında bir hinin divarını və pəncərə yerini sökərək içəridəki hind quşlarını aparıblar.
Hazırda hadisənin kimlər tərəfindən törədildiyini müəyyənləşdirmək üçün araşdırma aparılır.
Sakinlər bu hadisənin ilk olmadığını, kənddə xırda talamaların baş alıb getdiyini bildirir.
Onların sözlərinə görə, son vaxtlar kənddə ard-arda oğurluq hadisələri baş verir. Yalnız ev quşları yox, kənd təsərrüfatı alətləri də "sirli qüvvələr" tərəfindən yoxa çıxır. Belə ki, son günlər bəzi sakinlərin həyətlərindən generatorlar, odunkəsən və otbiçən mişarlar, qurudulmuş fındıq, kombi və hətta tinglər də torpaqdan çıxarılaraq oğurlanıb. Kənd camaatı bu qəribə və ardıcıl oğurluq hadisələrini törədən şəxslərin müəyyən edilməsini və məsuliyyətə cəlb olunmasını istəyir.
