Bakı-Quba-Rusiya sərhədi avtomobil yolu gün ərzində minlərlə nəqliyyat vasitəsinin hərəkət etdiyi strateji marşrutlardan biridir. Lakin bu yolun Siyəzən rayonu ərazisindən keçən hissəsində, Xıdırzində Piri ziyarətgahının aşağısında yerləşən dayanacaq məntəqəsinin acınacaqlı vəziyyəti həm sürücüləri, həm də sərnişinləri narahat edir.
Shimal.News redaksiyasına müraciət edən vətəndaşlar bildirirlər ki, uzun illərdir yolçuların dincəldiyi, yemək yediyi və ehtiyaclarını ödədiyi bu məkanda şərait bərbad vəziyyətdədir. Xüsusilə ictimai tualetlərdə suyun olmaması ciddi problemlər yaradır. Qapılar qırıq, içəridə üfunət iyindən dayanmaq mümkün deyil. İnsanlar məcbur qalıb 30 qəpik ödəyərək bu şəraitdə ehtiyaclarını ödəməyə çalışırlar. Suyun olmaması isə vəziyyəti daha da gərginləşdirir – nə kranlar işləyir, nə də təmizlik qaydalarına əməl olunur.
Bundan əlavə, ərazi tamamilə baxımsız qalıb. Plastik tullantılar, palçıq və çirkab içində gölməçələr yolçuların buranı tərk etmək üçün tələsik hərəkət etməsinə səbəb olur. Yeməkxanalar və ticarət obyektlərində satılan məhsullara nə keyfiyyət, nə də qiymət baxımından nəzarət edilir. Bu şərait hər gün minlərlə insanın üzləşdiyi bir problemdir.
Sual yaranır, aidiyyəti qurumlar bu vəziyyətə nə vaxt müdaxilə edəcək? Azərbaycanın nəqliyyat və turizm infrastrukturu üçün utancverici olan bu mənzərənin tezliklə aradan qaldırılması vacibdir.
