Xaçmaz rayonunda doğum gününü qeyd edən şəhid övladları ilə görüş keçirilib.
ShimalNews xəbər verir ki, icra başçısı Elnur Rzayev, şəhid Tural Ağcabəyovun qızı Leylanın 10 yaşı və şəhid Müqəddəs Qədirovun qızı Nurayın 5 yaşı tamam olması münasibətilə hər iki şəhidin ailə üzvləri ilə görüşüb. Rzayev şəhid övladlarını təbrik edib, xatirə hədiyyələri təqdim edib.
Kiçik çavuş Tural Ağcabəyov 1987-ci il 14 sentyabrdə Xaçmaz rayonu, Manafoba kəndində anadan olub. O, Azərbaycan Respublikasının Silahlı Qüvvələri tərəfindən 2023-cü il sentyabrın 20-də həyata keçirilmiş uğurlu lokal antiterror tədbirləri zamanı Ağdərə rayonunda şəhid olub.
MAHHXHQ əsgər Müqəddəs Qədirov 1992-ci il 14 maydə Xaçmaz rayon Dədəli kəndində anadan olub. O, Vətən müharibəsində Cəbrayıl və Füzuli istiqamətində gedən döyüşlərdə iştirak edib. Qədirov oktyabrın 6-da Füzuli istiqamətində gedən döyüşlər zamanı şəhid olub. Ölümündən sonra “Vətən uğrunda”, “Cəsur döyüşçü” və “Füzulinin azad olunmasına görə” medalları ilə təltif edilib.
