Bakıda bıçaqlanma hadisəsi baş verib.
Bakuplus.az-ın məlumatına görə, Xaçmaz rayonunda anadan olan 29 yaşlı Etibar Məmmədov (ad şərtidir) Qismət Qasımovla (ad şərtidir) mübahisə edib.
Hadisə ötən ilin aprelin 23-ü Abşeron rayonu, Əliağa Vahid küçəsində baş verib. Buna səbəb Qismətin onun bacısına mesaj yazması olub. Aralarında baş vermiş mübahisə zamanı Etibar evdən götürdüyü bıçaqla Qisməti ağır yaralayıb.
Nəticədə Etibar Məmmədov Azərbaycan Respublikası CM-nin 126.1-ci (sağlamlığa ağır zərbə vurma) maddələri ilə təqsirləndirilib. İstintaq Sumqayıt Ağır Cinayətlər Məhkəməsində keçirilib.
Məhkəmədə təqsirləndirilən şəxs qismində dindirilən Etibar Məmmədov ona qarşı irəli sürülən ittiham üzrə özünü qismən təqsirli bilib. O, ifadəsində göstərib:
“Qisməti əvvəldən tanımırdım. Sonra eşitdim ki, bu adda olan bir şəxs bizə elçi gəlib, bacım Ayşəni almaq istəyir. Lakin mən razı olmadım, qərarımızı da həm Qismətin özünə, həm də anasına bildirdik. Hadisə günü Ayşənin telefonunu götürüb işə getdim. Yolda baxanda Qismətin ona mesaj göndərdiyini gördüm. Ona zəng edib axşam görüşə çağırdım. Qismət görüşə bibisi oğlu Rövşən və adını bilmədiyim digər qohumu ilə gəlmişdi. Bacımı ona verməyəcəyimi deyib, nömrəsini haradan əldə etdiyini soruşdum. Cavabında “o sənin ailənin problemidir” ifadəsini işlətdi. Bu səbəbdən əsəbiləşib, üzərimdə olan bıçaqla onu yaraladım”.
Daha sonra zərərçəkmiş Qismət Qasımov məhkəmədə ifadə verib:
“Təxminən 1 il əvvəl Masazır kəndində Ayşən adlı qızla tanış oluduq. İlk başlarda münasibətimiz yaxşı olsa da, sonradan pisləşdi. Münasibətlərin pisləşməsinə səbəb isə ailəmin Ayşəngilə elçi gedib imtina cavabı alması idi. Ayşənə demişdim ki, onunla ailə həyatı qurmağa hazıram, lakin qardaşı buna imkan vermir. Bir gün Ayşənə yazdığım mesajı Etibar görüb, mənə zəng edərək görüşə çağırdı. Görüş zamanı aramızda olan mübahisədə Etibar məni bıçaqla vurdu”.
Məhkəmə tədqiq edilmiş sübutlara məcmu halda hüquqi qiymət verərək Etibar Məmmədovu cinayət üzrə təqsirli bilib. Məhkəmənin qərarı ilə Etibar Məmmədov 4 il müddətinə azadlıqdan məhrum edilib.
