Yeni ilin rəmzi olan dovşan Xaçmazda təsərrüfatı olan Oleq Fomoviçin gəlir mənbəyidir. Bu barədə ShimalNews 4 yanvar tarixində Azərtac-a istinadən məlumat verir.
Oleq əvvəllər bu heyvanları maraq üçün bəsləsə də, artıq 40 ildir ki, hobbisini biznesə çevirib. Onun ferması Xudat şəhəri yaxınlığında yerləşir. Burada müxtəlif növ dovşanlar var. Onların sayı 100-dən çoxdur, lakin təsərrüfatçı bu rəqəmi 2-3 dəfə artırmaq imkanı olduğunu deyir:
“Burada 10-a yaxın dovşan növü var. Kaliforniya, Velikan, Vlandır, xaricdən gətirilmiş ağ və qırmızı Rizel kimi ətlik dovşan növlərinə üstünlük verirəm. Dovşanlar satış üçün nəzərdə tutulub. 3-4 aylıq dovşan 2 kiloqram ət verir”.
Oleq hələ 7 yaşı olanda dovşan saxlamağa başlayıb. Onun ilk heyvanları dayısının təsərrüfatından götürdüyü yerli sort dovşanlar olub. Amma son 20 ildir ancaq cins heyvanlar saxlayır və gəlir əldə edir:
“Pandemiya dövrünə qədər dovşan ətinin satışı yaxşı idi. Yetişdirdiyimiz heyvanların ətini Xaçmazdan, Bakıdan olan müştərilərimiz topdan satış qiymətə alırdılar. Onlar da müxtəlif şirkətlərə verirdilər. Amma son 2 ildə dovşan ətinə maraq çox azalıb. Regiondakı dovşan təsərrüfatlarının əksəriyyəti fəaliyyətini dayandırıb. Dovşan saxlamaq çətin deyil. Amma satışını təşkil edə bilməyəndən sonra saxlamağa dəyməz”.
Dovşan əti yağsız, xolesterinsiz olduğu üçün dietik sayılır. Şəkər xəstəliyi olanlar, pəhriz saxlayanlar dovşan ətinə üstünlük verirlər.
Oleq Fomoviç deyir ki, dovşanlar ən artımlı heyvanlardan biridir. Bunlar növündən asılı olaraq hər ay 8-10 bala verir. Dörd aylığında isə ət istehsalına verilir.
Dovşanların xəstəliklərə yoluxmasının qarşısını almaq üçün daim baytarlarla məsləhətləşmək lazımdır. Bu heyvanların yem rasionunu arpa, buğda, qarğıdalı, günəbaxan toxumu və yonca təşkil edir.
Astroloqların sözlərinə görə, Dovşan ilində anadan olanlar parlaq fərdi keyfiyyətlərə malik olurlar. Bu insanlar istedadlı və şöhrətpərəst, xeyirxah və təmkinlidirlər, incə zövqləri ilə fərqlənirlər. Hamını heyran qoyur və etimad qazanırlar. Bəzən qeybət etməyi xoşlayırlar, lakin nəzakətlidirlər, hirsli deyillər. Sevdikləri ilə incə rəftar edirlər, yaxın qohumları ilə çox nadir hallarda sıx əlaqə saxlayırlar. Demək olar ki, heç vaxt qızışıb özlərindən çıxmırlar, gözəl işgüzar keyfiyyətlərə malikdirlər. Vicdanlı və sözü bütövdürlər, bəzən xırdaçı və vasvası olur, bəzən qəmginləşirlər. Əla oyunçu ola bilərlər, lakin mühafizəkar və ehtiyatlı olduqlarına görə nadir hallarda oynayırlar.
