Xaçmaz rayonu üzrə təhsil sektorunun tabeliyində fəaliyyət göstərən ümumi təhsil müəssisələrinin IV sinfində dərs deyən ibtidai sinif müəllimləri və həmçinin şagird sayı 500-dən çox olan məktəblərin direktorları ilə görüş keçirilib.
Shimal.News xəbər verir ki, görüşdə sektor müdiri Qələmşah Dostuyev ötən tədris ilində keçirilmiş monitorinqlərin nəticələri barədə danışıb və görüləcək işlər bir daha nəzərdən keçirilib.
Məktəbəqədər və Ümumi Təhsil üzrə Dövlət Agentliyi tərəfindən rayon ümumi təhsil müəssisələri üçün müəyyən olunmuş hədəflər çərçivəsində təhsil sektorunun hər bir məktəb üçün ayrı-ayrılıqda hazırladığı hədəf göstəriciləri təqdim olunub.
Nəticələrin yüksəldilməsi istiqamətində geniş müzakirə aparılıb, həm məktəb direktorları, həm də müəllimlər çoxsaylı fikirlər səsləndiriblər.
Faydalı keçən görüşdə IV sinifdə tədris aparan müəllimlər nəticələrin yüksəldilməsi üçün çalışacaqlarına söz veriblər.
Növbəti belə bir tədbir VI sinifdə tədris aparan Azərbaycan dili, Riyaziyyat və Təbiət fənn müəllimləri üçün planlaşdırılıb.
