Bir müddət öncə Xaçmaz şəhərinin Məktəbli və M.Qudyalçaylı küçələrini birləşdirən adsız və xəritədə olmayan küçənin təmirə ehtiyacı olması ilə bağlı xəbər yayımlamışdıq.
Shimal.News xəbər verir ki, nəhayət aidiyyəti qurumlar hərəkətə keçərək küçəyə asfalt qırıntıları töküblər.
Onların bu “jesti”nə baxmayaraq, sakinlər narahatdır: “Asfalt qırıntıları yetərli olacaqmı? Yağış yağanda bu qırıntılar da torpağa qarışıb yoxa çıxmayacaq ki?!”.
Bəlkə də, gələcəkdə bu keçid tam təmir olunacaq amma o vaxta qədər bu yol Xaçmaz sakinləri üçün həm nostalji, həm də sabun köpüyü kimi müvəqqəti bir həll olaraq qalacaq.
Qeyd edək ki, şəhərin N.Nərimanov, M.Qudyalçaylı küçələrindən Məktəbli küçəsinə aparan ən yaxın yol bu aralıq məhəllədən keçir. Təxminən 2 metr eni, 100 metrə yaxın uzunluğu olan bu keçid 6 saylı Körpələr Evi – Uşaq bağçası ilə fərdi yaşayış evlərinin arasında yerləşir. Məktəbə, bağçaya, işə gedən hər kəs əlavə yol qət etməmək üçün bu ara məhəllədən keçməklə yollarını qısaldırlar.
