Xaçmaz şəhərində yerləşən şəhid Fərid Seyfullayev küçəsinin bərbad vəziyyətdə olması ciddi narazılığa səbəb olub.
Sakinlərin Shimal.News-a göndərdiyi şikayətdə bildirilir ki, xüsusilə yağışlı havalarda küçədən keçmək mümkünsüz olur.
Əvvəllər Bakı küçəsi kimi tanınan küçəyə Vətən müharibəsi şəhidi Fərid Seyfullayevin adı verilib. Yolun pis vəziyyətdə olması və yağış sularının axıb getməsi üçün heç bir drenaj sisteminin qurulmaması səbəbindən hərəkət etmək, xüsusən də piyada hərəkəti olduqca çətindir.
“Hər dəfə yağış yağanda evdən çıxmağa çətinlik çəkirik. Uşaqları məktəbə aparmaq əsl problemə çevrilib. Küçədə nə suyun axını üçün kanalizasiya sistemi var, nə də yollar təmir olunub. Bu cür vəziyyət nə şəhidin adını daşıyan küçəyə yaraşır, nə də normal həyat şəraitinə uyğun gəlir”, – deyə sakinlərdən biri narazılığını ifadə edib.
Onların sözlərinə görə, problemin həlli üçün aidiyyəti qurumlara dəfələrlə müraciət edilib, lakin hələ də nəticə yoxdur.
