Qışın sərt günlərində Xaçmaz rayonu İstisu qəsəbəsində yeni tikilən məktəb uşaqların bilik aldığı deyil, xəstələndiyi məkana çevrilib.
Shimal.News redaksiyasına daxil olan şikayətlərə görə, valideynlər artıq bu cür dözülməz hala etiraz edirlər.
Məlumata görə, həftənin 4-cü, 5-ci və şənbə günləri məktəbdə istilik ümumiyyətlə olmur. Həftənin ilk günü verilən az miqdarda dizellə 2 saatlıq isinmə təmin olunsa da, bu müddət ərzində 3 mərtəbəli binanı tam isitmək olmur. Gecə şaxtaları ilə birlikdə vəziyyət daha da ağırlaşır – məktəbin pəncərələrindən su axır, divarlar nəmlənir, döşəmələr buz kimi olur. Uşaqlar bir gün məktəbə gedəndən sonra öskürməyə başlayırlar, burunları axır, xəstələnirlər.
İddialara görə, uşaqlar və müəllimlər sinif otaqlarında papaq, şərf və qış gödəkçələrində otururlar. Lakin məsələ şəkil çəkdirməyə gələndə dərhal “geyinilən paltarları çıxarın” göstərişi verilir. Yəni reallıq gizlədilir, problem həll edilmir.
Bu, təhsilə mane olmaqla yanaşı, şagirdlərin sağlamlığı üçün ciddi təhlükə yaradır.
Məktəbin tikintisi 8-9 aya başa çatıb. Amma təəccüblüsü budur ki, bu müddət ərzində qazlaşdırma ilə bağlı sənədləşmə problemi həll olunmayıb. Bu qədər vaxtda böyük binaların qaz çəkilişi tamamlanır, amma bir məktəbin sənədləri niyə həllini tapmır?
Valideynlər suallarla hər həftə Elm və Təhsil Nazirliyinin “146” qaynar xəttinə zəng etsələr də, heç bir tədbir görülmür.
