Xaçmazlı təsərrüfatçılar şaftalı bağlarından tezyetişən sortların yığımına başlayıblar. Bu haqda ShimalNews 27 iyun tarixində Azərtac-a istinadən məlumat verir.
Rayon ərazisində ümumilikdə 2900 hektardan çox şaftalı bağı var. Həmin bağlardan 800 hektara yaxını müasir suvarma sistemi ilə təmin olunan intensiv bağlardır. Hər il bağlardan 7 min tondan çox şaftalı toplanır.
Ən çox şaftalı bağları Nərəcan kəndinin ərazisindədir. Burada 800 hektara yaxın meyvə bağında şaftalının 50-dən çox növü becərilir. Nərəcanda yetişdirilən şaftalı bütün Azərbaycanda tanınır.
“Şaftalı vaxtında yığılmalıdır. Yoxsa ağacda məhv olub çürüyər. Bizim bağda şaftalının 10-a yaxın növünü becəririk. Ardıcıl yetişən növlərdir. Müştəri sarıdan çətinlik olmur. Amma əsas məsələ qiymətdir. Məhsul yaxşı qiymətə satılanda fermerlər qazanc əldə edə bilirlər”, - deyə təsərrüfatçı Seymur İsmayılov bildirib.
