Xaçmazlı təsərrüfatçılar şaftalı ilə yanaşı, nektarin bağlarına üstünlük verirlər. Bu haqda ShimalNews 25 iyul tarixində Azərtac-a istinadən məlumat verir.
Hazırda nektarinin topdansatış qiyməti növündən və keyfiyyətindən asılı olaraq, 1 kq üçün 50 qəpikdən 1 manata kimi dəyişir. Bu meyvə iyul ayından başlayaraq oktyabr ayınadək bağlardan toplanılır.
“Nektarinə də şaftalı kimi qulluq olunur. Amma nektarin daha çox diqqət tələb edən meyvədir. Aqrotexniki qulluq, dərmanlama gecikdirilsə, meyvələr qurdlu və ləkəli olur. Əvvəllər nektarini şaftalının bir növü kimi bilirdik. İndi Xaçmaz bağlarında nektarinin ondan çox sortu becərilir. Bazarda bu meyvəyə tələbat da çoxdur. Məhsulu yerli bazarda da satırıq. Amma daha çox Rusiyaya göndərilir”, - deyə təsərrüfatçı Bəhruz İsmayılov bildirib.
İxrac olunan meyvə bir müddət rayon ərazisindəki soyuducu anbarlarda saxlanılır. Sonra iritutumlu yük avtomobillərinə yüklənərək qonşu ölkəyə yola salınır.
