Xaçmaz rayonunda narkomaniyanın profilaktikasına dair maarifləndirici tədbir keçirilib.
Shimal.News xəbər verir ki, tədbir Xaçmaz Peşə Liseyində Xaçmaz rayon Polis Şöbəsinin, Xaçmaz Peşə Liseyinin və Xaçmaz rayonu üzrə gənclər və idman sektorunun birgə təşkilatçılığı və lisey tələbələrinin iştirakı ilə baş tutub.
Çıxış edənlər cəmiyyətin bəlası olan narkomaniya, onun faciəvi fəsadları, icrası başa çatmış "Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019-2024-cü illər üçün Dövlət Proqramı" və dövlət orqanlarının üzərinə düşən vəzifə və öhdəliklər haqqında danışıblar.
Yeniyetmə və gənclərin antinarkomaniya ruhunda tərbiyə olunması təkcə dövlətin üzərinə düşən məsuliyyət olmaması, bu istiqamətdə hər bir vətəndaşın, ictimai qurum və təşkilatların, kütləvi informasiya vasitələrinin, həmçinin mədəni-maarif müəssisələrinin töhfə verməli olduğu vurğulanıb.
Daha sonra tələbələrin müvafiq mövzuda sualları cavablandırılıb.
Qeyd edək ki, tədbirə 110 nəfər iştirakçı qatılıb.
