Xaçmazda ikinci dəfə qətl törədən şəxs polis tərəfindən tutulub.
Shimal.News-un əldə etdiyi məlumata görə, Köhnə Xaçmaz kənd sakini, fiziki qüsurlu 57 yaşlı Akif Qəribov oktyabrın 12-də ölümcül döyülüb. O, qardaşı tərəfindən Xaçmaz Rayon Mərkəzi Xəstəxanasına çatdırılıb və reanimasiya şöbəsinə yerləşdirilib.
Baş nahiyəsindən aldığı ağır xəsarətlər nəticəsində A.Qəribov bu gün reanimasiyada vəfat edib. Ona küt alətlə ağır xəsarətlər yetirən həmkəndlisi 50 yaşlı Eynulla Musayev polis tərəfindən saxlanılıb. Hazırda qətlin səbəbləri araşdırılır.
Məlum olub ki, bu Eynulla Musayevin törətdiyi ilk adam öldürmə hadisəsi deyil. O, 2013-cü ildə onunla intim münasibətdən imtina edən həyat yoldaşı Şərqiyyə Musayevanın başını kəsərək qətlə yetirib. 2014-cü ilin yanvarında məhkəmənin hökmü ilə 9 il müddətinə azadlıqdan mərhum edilib.
