Xaçmazda həbsdən çıxan kişi xəyanət üstündə həmkəndlisini öldürüb.
Shimal.News-un əldə etdiyi məlumata görə, hadisənin istintaqı Sumqayıt Ağır Cinayətlər Məhkəməsində keçirilib.
Belə ki, 1974-cü il təvəllüdlü Novruz Nəcəfov (ad şərtidir) Xaçmaz rayonunda doğulub. O, 2013-cü ildə həyat yoldaşı Sevda Nəcəfovanı (ad şərtidir) həmkəndlisi ilə ona xəyanət etdiyi üçün öldürdüyünə görə 9 il müddətinə azadlıqdan məhrum edilib. 2022-ci ildə azadlığa çıxdıqdan sonra illərdir içində bəslədiyi kinlə Sevdanın ölümünə səbəb olan məşuqunu, yəni həmkəndlisi Əfqan Səfərovu (ad şərtidir) öldürmək qərarına gəlib. Bu məqsədlə ötən ilin oktyabrın 12-si sərxoş halda Əfqan Səfərovun evinə daxil olub. O, xüsusi amansızlıqla Əfqanın baş nahiyəsindən dəfələrlə vuraraq həyatdan məhrum edib.
Novruz Nəcəfova Azərbaycan Respublikası CM-nin 120.2.2, 120.2.4, 120.2.9 və 157.1-ci (köməksiz vəziyyətdə olan şəxsi həyatdan məhrum etmə) maddələri ilə təqsirləndirilib.
Məhkəmədə təqsirləndirilən şəxs qismində dindirilən Novruz Nəcəfov ona qarşı irəli sürülən ittiham üzrə özünü təqsirli bilməyib. O ifadəsində göstərib:
“Əfqan mənim namusuma göz dikmişdi. Arvadım Sevda ilə sevgi münasibəti yaşayıb. Bu səbəbdən arvadımı da öldürdüm. Haqq-ədalətlə cəzamı çəkib çıxdım. Amma Əfqanı öldürmək niyyətim yox idi, sadəcə qorxutmaq istəyirdim”.
Daha sonra zərərçəkmiş Əfqan Səfərovun hüquqi varisi ifadə verib:
“Hadisə ilə bağlı heç nə görməmişəm. Qardaşım Əfqan tək yaşayırdı və xəstə idi. Nə yeriyə, nə də danışa bilirdi. Onun döyülmə xəbərini alan kimi qardaşımgilə qaçdım. Al qan içində olduğunu gördüm. Xəstəxanaya çatdırsaq da, həyatını xilas edə bilmədik”.
Sonda məhkəmənin qərarı ilə Novruz Nəcəfov 16 il 10 ay müddətinə azadlıqdan məhrum edilib.
Fidan İlqar
