Xaçmazda həyat yoldaşını öldürməyə cəhd etməkdə təqsirləndirilən Allahverdi Mustafayevin barəsindəki məhkəm qərarından kassasiya şikayəti verilib.
Pravda.az-ın məlumatına görə, şikayət Ali Məhkəmənin hakimi Tahir Kazımovun sədrliyi ilə araşdırılacaq. İlkin iclas tarixi açıqlanmayıb.
Hadisə 2023-cü il yanvarın 6-da Hacılar kəndi ərazisində qeydə alınıb. 32 yaşlı Aynur Əhmədovanın xəsarət alması barədə rayon prokurorluğuna məlumat daxil olub. Araşdırma zamanı 35 yaşlı Allahverdi Mustafayevin şəxsi münasibətlər zəminində mübahisə zamanı Aynur Əhmədovaya bıçaqla çoxsaylı xəsarətlər yetirərək onu qəsdən öldürməyə cəhd etməsinə əsaslı şübhələr müəyyən edilib.
Faktla bağlı Xaçmaz rayon prokurorluğunda Cinayət Məcəlləsinin 29, 120.1-ci (qəsdən adam öldürməyə cəhd) maddəsi ilə cinayət işi başlanıb. Sumqayıt Ağır Cinayətlər Məhkəməsinin hökmü ilə o, 11 il 3 ay müddətinə azadlıqdan məhrum edilib. Hökmdən narazı qalan məhkumun apellyasiya şikayəti Sumqayıt Apellyasiya Məhkəməsində təmin edilməyib.
