Belə ki, 1997-ci il təvəllüdlü İsa Nəcəfov (ad şərtidir) rayon mərkəzində dostu ilə spirtli içki qəbul edib. Bundan sonra o, Xaçmazın Yergüc kəndindəki evinə gedib. Amma evin qapısı bağlı olduğu üçün qonşusu - psixi xəstəlikdən əziyyət çəkən əmisi arvadı Safura Nəcəfovanın (ad şərtidir) həyətindən öz evinə keçmək istəyib. Qadın onu evinə dəvət edib və sobanı qalamaq üçün kömək istəyib. İsa sobanı qalayanda Safura onun belindən tutaraq divara tərəf itələyib və üstünə qışqırıb. Bunu səbəb gətirərək İsa Nəcəfov odunla qadının başına 7 dəfə zərbə vuraraq öldürüb.

İsa Nəcəfov Azərbaycan Respublikası CM-nin 120.2.2, 120.2.4 və 120.2.9-cu (köməksiz vəziyyətdə olan digər şəxsi qəsdən həyatdan məhrum etmə) maddələri ilə təqsirləndirilib.

Məhkəmədə təqsirləndirilən şəxs qismində dindirilən İsa Nəcəfov ona qarşı irəli sürülən ittiham üzrə özünü qismən təqsirli bilib. O ifadəsində göstərib ki, dostu ilə yeyib-içdikdən sonra evə gedərək qapını döysə də, açan olmayıb:

“Darvazanı açan olmadı, anama zəng etdim cavab vermədi. Əmimgildən keçərək evimizə girmək istədim. Bu zaman əmim arvadı Safuranın evin qarşısında öz-özünə danışdığını gördüm. Ona yaxınlaşanda, əmim arvadı evinin soyuq olduğunu dedi. İçəri keçib sobanı qalamağa başladım. Safura əlləri ilə arxadan məni qucaqlayıb, divara itələdi. Qışqırmağa başladı. Buna əsəbiləşib əlimdəki odun parçası ilə onun başına vurmağa başladım.

Daha sonra, Xaçmaz tərəfə getdim. Anam zəng edərək “Safura ölüb” dedi. Özüm gedib polis idarəsinə könüllü şəkildə təslim oldum”.

Məhkəmə istintaqı zamanı dindirilmiş zərərçəkmiş şəxsin hüquqi varisi, oğlu Vəli Nəcəfov (ad şərtidir) ifadəsində göstərib ki, mərhum anası Safura ilə birlikdə yaşayır:

“Hadisədən 2-3 gün əvvəl qardaşımı aqressiv hərəkətlər sərgilədiyi üçün Quba rayon ruhi-əsəb dispanserinə yerləşdirmişdim. Anamda psixi problem, yaddaş pozğunluğu var idi. Onun kimisə vurmaq, söymək və yaxud haranısa dağıtmaq və s. kimi davranışları olmayıb. Hadisə günü anam Safura evdə tək qalmışdı. Novruz bayramı ərəfəsində bacılarım anama bayram payı aparmaq üçün onun yanına gedib və qapını açanda yaşlı qadının yerdə al-qan içində olduğunu görüblər. Bacılarım bu cinayəti kiçik qardaşımızın törətdiyini düşünüblər və qorxaraq oradan uzaqlaşıblar. Əmimə görə barışmışam. Amma İsanın danışdığı hər şey yalandır”.

Beləliklə, məhkəmə tədqiq edilmiş sübutlara məcmu halda hüquqi qiymət verərək İsa Nəcəfovun Safura Nəcəfovanı xüsusi amansızlıqla qətlə yetirməsini sübut edib. Məhkəmədə aparılan istintaq və tərəflərin çıxışları ilə İsa Nəcəfov cinayət üzrə təqsirli bilinib.

Tərəflərin çıxışından sonra məhkəmə müşavirəyə yollanıb. Sonda məhkəmənin qərarı ilə İsa Nəcəfov 17 il müddətinə azadlıqdan məhrum edilib.

Fidan İlqar