Ötən gün DOST xidmətinin Xaçmaz Qaz İstismar İdarəsinə təhkim etdiyi 70 işçisinin səbəb göstərilmədən və heç bir xəbərdarlıq edilmədən ixtisar edildiyi ilə bağlı məlumat yayıldı.
Məsələ ilə bağlı DOST İş Mərkəzi İctimaiyyətlə Əlaqələr şöbəsindən Shimal.News-un sorğusuna cavab olaraq bildirilib ki, Xaçmaz Regional Qaz İstismar İdarəsində haqqı ödənilən ictimai işlərdə çalışan bir qrup işçinin işdən çıxarılmasına səbəb onlarla bağlanan əmək müqaviləsinin müddətinin başa çatmasıdır:
“Bunu da qeyd edək ki, haqqı ödənilən ictimai işlər proqramı ilkin peşə hazırlığı, ixtisası olmayan, buna görə də iş tapmaqda çətinlik çəkən şəxslərin əmək bazarına çıxışının dəstəklənməsi üçün onların müəyyən bir dövr üzrə, müddətli əsasda məşğulluğunun təminatına, eyni zamanda onların məşğulluq imkanlarının artırılması üçün ilkin peşə vərdişləri qazanması məqsədinə xidmət edir.
“Haqqı ödənilən ictimai işlərin təşkili Qaydalarının təsdiq edilməsi barədə Azərbaycan Respublikası Nazirlər Kabinetinin Qərarı”nın 2.6-cı bəndinə əsasən ictimai işlər, bir qayda olaraq, 2 aya qədər müddətə təşkil olunur”.
Nəzrin Vahid
