Arvadını, baldızını, qaynını və qayınanasını amansızlıqla qətlə yetirməyə cəhddə təqsirləndirilən Quba sakini barəsindəki hökmdən apellyasiya şikayəti verilib. Bu haqda ShimalNews 10 iyul tarixində “Pravda.az”a istinadən məlumat verir.
40 yaşlı Niyaməddin Qədirovun şikayəti hazırda Sumqayıt Apellyasiya Məhkəməsinin hakimi Elman Rəhimovun sədrliyi ilə araşdırılır. O, cəzasının yüngülləşdirilməsini istəyir.
İttihama görə, Qədirov ailə münaqişəsi zəminində ondan ayrılaraq anasının yanında yaşayan həyat yoldaşı Ülviyyə Qədirovanın ardınca Xaçmaz rayonunun Niyazoba kəndinə gedib. Təqsirləndirilən şəxsin qayınatasına məxsus evdə arvadını, onun anasını, bacısını və qardaşını çoxsaylı zərbələrlə bıçaqlayaraq ağır xəsarətlər yetirməsi haqda məlumat vermişdik.
Sumqayıt Ağır Cinayətlər Məhkəməsinin hökmü ilə ona 11 il 3 ay həbs cəzası verilib.
