Azərbaycan səhiyyəsinin problemi illərdir ki, təkcə müalicə ilə məhdudlaşmır. Xəstələrin sağalmaq ümidilə üz tutduqları xəstəxanalar artıq tibbi xidmət yox, yeni "biznes sahələri" ilə diqqət çəkir.
Xaçmaz Rayon Mərkəzi Xəstəxanasında baş verənlər isə insanları müalicədən çox, maddi sıxıntıya salır. Bəli, burada tibb xidmətləri ödənişli ola bilər, amma görünür, indi "təbii ehtiyaclar" da bazar iqtisadiyyatına keçib.
Bu xəstəxanaya müraciət edən hər bir şəxs artıq nəinki həkim tapmaqda, hətta ən adi ehtiyaclarını ödəməkdə belə çətinlik çəkir. Sakinlərin sözlərinə görə, xəstəxananın həyətində fəaliyyət göstərən tualetlər ödənişlidir. Maraqlıdır, burada suyun keyfiyyəti artırılıb, yoxsa divarlar qızılla örtülüb? Əsla! Söhbət sadə bir tualetdən gedir, lakin qiyməti elə bil hansısa lüks restoranın VIP xidməti qədər dəyərlidir.
Böyrək xəstəsi olan bir sakin isə vəziyyəti belə təsvir edir:
"Tez-tez tualetə getməliyəm, amma cibimdə pul yox idi. İçəridə işləyən şəxs məni açıq şəkildə təhqir etdi, dedi ki, xəstəxanaya gələndə cibinə pul qoy. Bəs biz buraya sağalmağa gəlirik, yoxsa biznes obyektinə?"
İddialara görə, xəstəxananın birinci mərtəbəsindəki tualetlər ya bağlı olur, ya da ümumiyyətlə işləmir. Gecələr isə vəziyyət daha da dramatikləşir: nə həyətdəki pullu tualet açıq olur, nə də içəridəkilər. Yəni xəstələrin gecə saatlarında qarşısında iki seçim var: ya dərdini içinə çəkib gözləmək, ya da xəstəxananın həyətində ehtiyacını ödəmək. Bu, artıq nə gigiyenaya, nə insanlığa, nə də səhiyyənin adını qaldırmağa xidmət edir.
Məsələ burasındadır ki, xəstəxanalar insanların sağlamlığına xidmət etməlidir, onların son qəpik-quruşunu almağa yox. Görünən odur ki, Xaçmaz xəstəxanası səhiyyə müəssisəsindən daha çox kiçik sahibkarların biznes layihəsinə çevrilib. Maraqlıdır, növbəti addımları nə olacaq? Xəstəxana palataları da kirayəyə veriləcək, yoxsa giriş üçün bilet satacaqlar?
Bəlkə də, bir gün səhiyyə sistemində bu cür absurd hallara son qoyular. Amma o gün gələnə qədər, xəstələr Xaçmaz xəstəxanasına gedərkən müalicə pulundan əvvəl "təbii ehtiyac büdcəsi"ni də nəzərə almalıdır. Əks halda, bu müəssisədə onları sağaltmaq yerinə, tam başqa problemlərlə üz-üzə qoyacaqlar.
Məhəmməd Tağı
