Xaçmazda soyuqdan donan sakinlər qəzəblidirlər. Günlərlə davam edən elektrik fasilələri insanları əsəbləşdirib. Bu səbəbdən Xaçmaz rayonundan redaksiyamıza daxil olan eyni məzmunlu şikayətlər bir-birini əvəzləyir.
Xaçmaz rayon sakinləri Shimal.News -a yazır ki, evlərində elektrik enerjisi gah var, gah yox. Ən pisi isə budur ki, bu fasilələr soyuq qış günlərində, qarın yağdığı bir vaxtda baş verir. Elektrik kəsiləndə kombilər də söndüyü üçün evlər buzxanaya dönür.
“Səhərdən işıqlar yanıb-sönür. Saatlarla fasilələr olur. Evdə donuruq! Əgər bu qəzadırsa, nə qədər olar? Hər gün, gecə-gündüz fasiləsiz qəza baş verərmi? Bu qədər yarıtmaz idarəçilik, bu qədər laqeydlik necə ola bilər? İnsanları belə şaxtalı havada soyuqda qoymağın adı nədir? Bu artıq biganəlikdir, məsuliyyətsizlikdir, rəzillikdir!” , - deyə sakinlər bildirirlər.
Xaçmaz sakinləri səlahiyyətli qurumlardan konkret addımlar atılmasını tələb edirlər.
