DOST xidmətinin Xaçmaz Qaz İstismar İdarəsinə təhkim etdiyi 70 nəfər işçisi səbəb göstərilmədən ixtisar edilib.
Həmin şəxslərdən biri olan Xaçmaz şəhər sakini Elşad Paşayev Shimal.News-a bildirib ki, onlara ixtisar ediləcəkləri ilə bağlı xəbərdarlıq edilməyib. Gələcəkdə işlə təmin edəcəklərinə dair də söz verilməyib:
“İşə bərpa olunmaq istəyirəm. Mənim kimi ixtisar edilən digər işçilər də müvafiq qurumlara müraciət etsələr də, nəticə olmayıb. İxtisar edilən vətəndaşlar mexaniki qaz sayğaclarının aylıq göstəricilərinin oxunmasını həyata keçiriblər”.
Bildirilir ki, bu məsələ son 2-3 ay ərzində başlayıb. Onların əmək müqaviləsinin vaxtı bitib və yenilənməyib.
Məsələ ilə bağlı aidiyyəti qurumlara sorğu ünvanlamışıq.
