Xaçmaz rayonunda məktəblilər arasında minifutbol idman növü üzrə rayon turniri keçirilib.
ShimalNews məlumat verir ki, yarışda 2012-2013-cü il təvəllüdlü 140 oğlan şagird iştirak edib.
Qrup oyunlarından sonra yarımfinal qarşılaşmalarında C.Cabbarlı adına 6 nömrəli tam orta məktəbin komandası M.Babayev adına 1 nömrəli tam orta məktəbin komandasına, A.Səlimov adına 7 nömrəli tam orta məktəbin komandası isə B.Rəsulov adına 5 nömrəli tam orta məktəbin komandasına qalib gəlib. Hər iki oyunun hesabı 4:1 olub.
3-cü yer uğrunda yarımfinal məğlubları qarşılaşıb, bu oyunda M.Babayev adına 1 nömrəli tam orta məktəbin komandası 3:0 hesabla üstün olub.
Final oyunu olduqca gərgin alınmışdır. Oyunboyu 1:0 üstün olan 7 nömrəli məktəbin komandası son 3 dəqiqədə 2 top buraxaraq turnirin qalibi olmaq imkanını əldən verib (hesab 1:2).
Mükafatçı yerlərin sahibləri Quba-Xaçmaz Regional Gənclər və İdman İdarəsinin müvafiq dərəcəli diplomları ilə təltif edilib.
