Xaçmaz rayon sakini iddia edir ki, onun həyat yoldaşı 85 min 980 manat məbləğində ət oğurluğunda ittiham edilir. Bu barədə ShimalNews 9 fevral tarixində "Qafqazinfo"ya istinadən xəbər verir.
Ayşə Qardaşova bildirib ki, Natiq Qardaşov Həsən Əliyev küçəsində yerləşən “Tonqal” restoranında kababçı işləyib:
“Ailədə 3 azyaşlı uşağın olmasına baxmayaraq, restoranın icarədarı Şəmsəddin Hüseynov tərəfindən üzərinə böhtan atılaraq qanunsuz şəkildə Cinayət Məcəlləsinin 177.3.2 maddəsi ilə (oğurluq) həbs edilib. Halbuki yoldaşımın cinayət törətməsi ilə bağlı heç bir sübut əhəmiyyəti kəsb edən dəlil yoxdur. Yoldaşımın etibarından sui-istifadə edilib. Belə ki, onu aldadaraq Natiqin latın qrafikasından tam anlamadığından istifadə edərək izahat yazaraq qol çəkdiriblər. Natiq 2022-ci il oktyabrın 7-dən 10-dək Nərimanov RPİ-nin müvəqqəti saxlama yerində saxlanılıb, daha sonra 3 saylı istintaq təcridxanasına aparılıb. Bu günə kimi dəfələrlə məhkəmələrə, Daxili İşlər Nazirliyinə, Baş Prokurorluğa müraciət etməyimizə baxmayaraq, yoldaşımın işinə baxılmayıb, o, hələ də Şüvəlanda istintaq təcridxanasında saxlanılır”.
Həbsdə olan şəxsin yoldaşı əlavə edib ki, həmin restoranın kuryeri Radiq Mehdiyev də cinayətdə şübhəli bilinir:
"Tonqal” restoranının icarədarı bizə qarşı yaraşmayan ifadələr işlədib. Bu işdə onun oğlu Samir Hüseynovun qərəzli münasibəti var. Onların arxalandığı vəzifəli şəxslər var. Onlar ata-bala bəzi vəzifəli şəxslərə güvənərək böhtan atmaqla, heç bir sübut olmadan, günahsız adamın, yoldaşım Natiqin həbs olunmasına müvəffəq olublar. Halbuki kababçı heç vaxt restorandan o qədər oğurluq edə bilməz, bu, məntiqə sığmayan bir hadisədir. Hansısa restoranın kababçısının işlədiyi restorandan iddia edildiyi kimi, 85 min manatlıq ət oğurlaması ağlasığmaz bir şeydir".
Məsələ ilə bağlı DİN-in və Baş Prokurorluğun Mətbuat xidmətindən bildirilib ki, hazırda istintaq hərəkətləri davam etdirilir.
