Quba rayonunda yerləşən sanatoriyada fizioterapevt işləyən qadın 10 min manatlıq dələduzluq ittihamı üzrə cinayət məsuliyyətindən azad edilib.
1982-ci il təvəllüdlü Amirə tanışının oğlunu Ukraynada universitetə qəbul etdirəcəyini, digər qohumunu isə Azərbaycandakı ali məktəblərdən birinə köçürəcəyini vəd edərək ondan ümumilikdə 12 min manat alıb.
Məhkəmə materiallarına əsasən, qadın 2 min manatı nağd, 10 min manatı isə bank kartına köçürmə yolu ilə əldə edib. O, öhdəliklərini yerinə yetirməyib və cinayət təqibi başlanana qədər yalnız 2 min manat qaytarıb.
Məhkəmədə ittihamı qəbul edən Amirə sənədləşmə ilə bağlı problemlərə görə vədlərini yerinə yetirə bilmədiyini bildirib. Sonradan zərərçəkmişlə barışdığını və dəymiş ziyanı tam ödədiyini qeyd edib. Zərərçəkmiş də pulun qaytarıldığını təsdiqləyərək şikayət və tələbinin olmadığını deyib.
Şahidlərin ifadələrinə görə, Amirə başqa qadınlara da pul müqabilində məktəblərdə direktor və kitabxanaçı vəzifələrinə düzəltmək təklifləri edib.
Məhkəmə ziyanın tam ödənilməsini, tərəflərin barışmasını və digər halları nəzərə alaraq "Konstitusiya və Suverenlik İli" münasibətilə elan edilmiş amnistiya qərarını tətbiq edib. Nəticədə qadın cinayət məsuliyyətindən azad olunub, cinayət təqibinə xitam verilib.
Mənbə: Qaynarinfo.аz
