Samur-Yalama Milli Parkında həşəratlar kütləvi şəkildə ağaclara hücum edib. Bu barədə ShimalNews 30 iyun tarixində Bizim.Media-ya istinadən məlumat verir.
Sakinlər massivdəki ağaclara ziyanvericilərin daraşdığını və onların kütləvi şəkildə quruduğunu deyiblər. Analoji vəziyyət Yalamadan Nabrana gələn yoldakı massivdə də müşahidə olunur.
Məsələ ilə bağlı Ekologiya və Təbii Sərvətlər Nazirliyinin Samur-Yalama Milli parkının direktoru Aqşin Qurbanov açıqlamasında faktı qismən təsdiqləyib. Onun sözlərinə görə, bu, kütləvi şəkildə deyil, ağacları zərərvericilərin basması halı yalnız bir zolaqda - Səlimoba-Tel yolunda, 3-cü Yalama ərazisində müşahidə olunur.
Əsasən, vələs ağaclarına qurd düşüb. Ziyanvericillərə qarşı tədbirlərə qış aylarında başlanılıb. 50 hektara yaxın sahə dərmanlanıb və təmizlənib.
Aqşin Qurbanov onu da deyib ki, müşahidə olunan zərərverici el arasında qaraçı güvəçi kimi tanınan tək ipək sarıyan adlanır. Onun hansı şəraitdə yayılması və əraziyə necə düşməsi isə elmi yolla araşdırılmalıdır.
