Xaçmazın şaftalı bağlarında məhsul yığımına başlanılıb. Bu haqda ShimalNews 12 iyul tarixində “Azərtac”a istinadən məlumat verir.
İyul ayının ilk günlərindən etibarən təsərrüfatçılar şaftalının “Zalatoy” və “Fədai” kimi tezyetişən sortlarını toplayırlar. Yığılan meyvələrin böyük hissəsi qonşu Rusiyanın müxtəlif şəhərlərindəki satış mərkəzlərinə göndərilir. Göndərilən məhsullar bir müddət rayon ərazisindəki soyuducu anbarlarda saxlanıldıqdan sonra iritutumlu yük avtomobilləri ilə yola salınır.
Meyvənin satış qiyməti də təsərrüfatçıları qane edir. Şaftalının bir kiloqramı 70 qəpik - 1,5 manat ətrafında dəyişir.
“İndi “Zalatoy” sortunu toplayırıq. Bu şaftalının hər kiloqramını bizdən yerində 0,7 - 1 manata alırlar. “Fədai” sortunu isə 1 - 1,5 manata alırlar. Yığılan məhsullar, əsasən, yerli və Rusiya bazarlarında satılır. Məhsuldarlıq ötən illə müqayisədə yaxşıdır. Məhsula tələbat da var. Qiyməti də sərfəlidir”, - Çiləgir kəndindən olan təsərrüfatçı Əliheydər Yusifov bildirib.
Rayonda şaftalı yığımı oktyabr ayınadək davam edəcək.
