Bu mövsum Xaçmazın gilas bağlarında 12 min 700 ton gilas toplanıb. Bu haqda ShimalNews 6 iyul tarixində Azərtac-a istinadən məlumat verir.
Cari ilin iyun ayında havanın qeyri-sabit keçməsi nəticəsində məhsulun 35-40 faizə qədəri ağacda çürüyüb. Əsasən, “Napoleon”, “Krım” sortları və ağ gilas ağacları yararsız vəziyyətə düşüb.
Ötən il bağlardan 20 186 ton gilas yığılıb. Hər hektara görə məhsuldarlıq 100 sentnerə yaxın olub. Son illər rayonda gilas bağlarının sahəsi xeyli artıb. Yeni salınan bağlar, əsasən, intensiv üsulla becərilir.
Toplanan məhsulun böyük hissəsi Rusiyaya ixrac edilib. Xarici bazara göndərilən məhsul növündən asılı olaraq, 3-5 manat arasında satılıb.
