Nabran istirahət zonasının yaxınlığındakı Meşəli kəndində baş verən qətlin detalları məlum olub. Bu barədə ShimalNews 8 iyul tarixində məlumat verir.
Dünən saat 15:00 radələrində baş vermiş hadisə haqqında məlumat vermişdik. Dənizə yaxın ərazidə 31 yaşlı əkiz qardaşlar - Kamran və Orxan İsgəndərovların meyitləri tapılmışdır.
Məlumata görə, dünyasını dəyişənlər Xudat qəsəbəsində tanınmış şəxs olmuş Hacı Qəzənfərin nəvələri, qızının övladları olublar. Mülk isə bir neçə il əvvəl vəfat etmiş ata tərəfdən babalarından qardaşlara miras qalıb.
Əkizlərin anası onlar hələ uşaq olarkən dünyasını dəyişib. Ataları Mirzə isə yenidən ailə qurub. Özləri Bakıda yaşasalar da, həmin gün Xaçmaza gələn qardaşlar arasında mülkün əsl sahibinin kim olması ilə bağlı münaqişə baş verib.
Orxan bıçaqla Kamranı vurub və onun boğazını kəsib. Daha sonra isə özünə xəsarətlər yetirərək intihar edib.
Faktla bağlı rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanaraq istintaq aparılır.
