ABŞ Prezidenti Donald Trampa Dünya Çempionatı–2026-nın Vaşinqtonda keçirilən püşkatma mərasimində təqdim olunan "Sülh mükafatı" üçün hazırlanmış bürünc heykəlcik həm dünya futbolunda, həm də Azərbaycanda böyük marağa səbəb olub.
Məlum olub ki, həmin heykəlcik xalq rəssamları Səlhab Məmmədov və Əli İbadullayevin müəllifi olduğu məşhur "Düşüncələr və xəyallar" kompozisiyasının mini-nüsxəsidir. Əsərin orijinalı hazırda Cenevrədə – BMT-nin baş qərargahının qarşısında yerləşir.
İdman.biz mövzu ilə bağlı heykəlin müəlliflərindən biri, Azərbaycan Dövlət Rəssamlıq Akademiyasının prorektoru, Rəssamlar İttifaqı sədrinin birinci müavini, şəkili Xalq rəssamı Səlhab Məmmədovdan açıqlama alıb.
Onun sözlərinə görə, FIFA bütün federasiyalara müraciət edərək yeni "Sülh mükafatı" üçün heykəl eskizləri istəyib:
"Bizim Əli İbadullayevlə birgə yaratdığımız əsər FIFA-nın diqqətini çəkib. Heykəl həm yer kürəsini, həm də futbol topunu simvolizə edir. Fərqli ölkələrdən olan insanlar onu birlikdə tutur. Bu, təşkilatın dəyərləri ilə üst-üstə düşdüyünə görə seçildi. Bundan əlavə, medal və xatirə nişanının hazırlanması da bizə tapşırıldı".
Səlhab Məmmədov bildirib ki, əsərlərinin bu qədər nüfuzlu beynəlxalq mükafata seçilməsi onlar üçün qürurvericidir:
"Dördmetrlik heykəlimiz BMT-nin qarşısında ucaldılarkən onun bir gün FIFA üçün lazım olacağını təsəvvür etməzdik. Bu qədər böyük marağın yaranacağını gözləmirdim".
Xatırladaq ki, Səlhab Məmmədov 4 yanvar 1943-cü ildə Nuxada (indiki Şəki) anadan olub. Onun yaradıcılığında saxsı və metalişləmə pannolar, nəqqaşlıq, qrafika və mənzərə əsərləri xüsusi yer tutur. Rəssam dünyanın bir çox ölkələrində keçirilən sərgilərin təşkilatçısı, baş dizayneri və baş rəssamı kimi də fəaliyyət göstərib.
