Siyəzən rayonunda 400-ə yaxın şagirdin təhsil aldığı Vüqar Qasımov adına Yenikənd kənd tam orta məktəbi ötən ilin qış aylarından bağlanıb.
Shimal.News xatırladır ki, 2024-cü il avqustun 19-da Quba–Xaçmaz Regional Təhsil İdarəsi (RTİ) rəsmi açıqlama yayıb. Həmin vaxt bildirilib ki, məktəbin vəziyyəti ilə bağlı aidiyyəti qurumlara məlumat verilib və yaxın vaxtlarda təmir-tikinti işlərinin həyata keçirilməsi nəzərdə tutulub.
Aradan bir il keçib və yeni tədris ili başlayıb. Quba–Xaçmaz RTİ isə məktəbin istismara yararsız vəziyyətdə olduğunu nəzərə alaraq onun növbəti ilin təmir planına daxil edildiyini açıqlayıb.
Mövcud vəziyyət səbəbindən şagirdlərin bir qismi Gilgilçay stansiya tam orta məktəbinə, digər qismi isə Gilgilçay qəsəbə tam orta məktəbinə köçürülüb. Lakin Gilgilçay stansiya tam orta məktəbinin də təmirə bağlanması ilə əlaqədar həmin şagirdlərin Siyəzən şəhər 6 nömrəli tam orta məktəbində təhsillərini davam etdirmələri üçün zəruri tədbirlər görülüb.
