Sumqayıt Apellyasiya Məhkəməsində hakimiyyət nümayəndəsinə qarşı müqavimət göstərməkdə təqsirləndirilən Yunis Əsgərovun barəsində dövlət ittihamçısının apellyasiya protesti və müdafiənin apellyasiya şikayəti üzrə məhkəmə iclası başa çatıb.
Pravda.az-ın məlumatına görə, hakim Ruhiyyə Əsgərovanın sədrliyi ilə keçirilən prosesdə qərar elan olunub: apellyasiya protesti və şikayət təmin edilməyib.
İttiham aktına əsasən, Yunis Əsgərov bu il Siyəzən şəhərində sərxoş vəziyyətdə aralarında şəxsi münasibətlər zəminində yaranmış münaqişə zamanı Zaman Budaqova bıçaqla xəsarət yetirib. Zərərçəkən Siyəzən Rayon Mərkəzi Xəstəxanasına yerləşdirilib.
Hadisədən sonra Yunis Əsgərov xəstəxanaya gəlib və səs-küy salıb. Xəstəxana əməkdaşları tərəfindən əraziyə polis çağırılıb və o, saxlanaraq Siyəzən RPŞ-yə gətirilib. Polis bölməsində Yunis qanuni tələblərə tabe olmayaraq yüksək səslə nalayiq ifadələr işlədib və mobil telefonla danışmağa davam edib. Növbətçi polis leytenantı S.M.-in tələbini yerinə yetirməyən Yunis öz aqressiv hərəkətlərini davam etdirib və polis əməkdaşının burun nahiyəsinə zərbə vurub. Nəticədə S.M. yüngül bədən xəsarəti alıb.
Siyəzən Rayon Məhkəməsinin hökmü ilə Yunis Əsgərov 11 ay 28 gün müddətinə azadlıqdan məhrum edilib və məhkəmə zalından həbs olunub.
