Siyəzən rayonunun Orta Həmyə kəndi fasiləsiz içməli su ilə təmin olunub.
Shimal.News xəbər verir ki, layihə Azərbaycan Dövlət Su Ehtiyatları Agentliyi (ADSEA) tərəfindən həyata keçirilib. Kəndin girişində şəhidlərin xatirəsinə inşa olunan bulaq kompleksinin qarşısında bununla bağlı tədbir keçirilib. Tədbirdə ADSEA sədrinin müavini İlham Bayramov, Siyəzən Rayon İcra Hakimiyyətinin başçısı Novruz Novruzov, Regional Su Meliorasiya Xidmətinin rəhbərliyi, şəhid ailələri, qazilər və kənd sakinləri iştirak ediblər.
Orta Həmyə kəndinin su problemi şəhərin mövcud içməli su sistemi ilə inteqrasiya edilərək həll edilib. Kənd daxilində yeni su xətti çəkilib, ümumilikdə 3 km uzunluğunda şəbəkə qurulub. 76 abonent ev birləşməsi ilə təmin olunub və su sayğacları quraşdırılıb. 261 nəfər əhalinin gündəlik 60 m³ su tələbatı yeni sistem vasitəsilə tam ödənilir.
Hazırda Siyəzən rayonunun 14 yaşayış məntəqəsi mərkəzləşdirilmiş su təchizatı ilə təmin olunur. 2025–2026-cı illərdə Tuğay və Zarat kəndlərində də analoji sistemlərin qurulması planlaşdırılır. Bununla yanaşı, tullantı su təmizləyici qurğularının yenilənməsi və suyun zərərsizləşdirilməsi üçün elektroliz texnologiyasının tətbiqi nəzərdə tutulur.
