Qaradağ Rayon Məhkəməsində mənimsəmədə təqsirləndirilən M.M-in (şərti) cinayət işi üzrə məhkəmə istintaqı yekunlaşıb.
Pravda.az-ın məlumatına görə, hakim Teymur Qurbanovun sədrliyi ilə keçirilən prosesdə hökm oxunub.
Məhkəmənin hökmü ilə təqsirləndirilən şəxsin Cinayət Məcəlləsinin 179.2.3 və 179.2.4- cü (mənimsəmə) maddələri ilə cinayət məsuliyyətindən azad edilməklə barəsində olan cinayət təqibi üzrə icraata xitam verilib. Onun barəsində seçilmiş başqa yerə getməmək haqqında iltizam qətimkan tədbiri ləğv edilib.
İttihama görə, M.M. Siyəzən rayonu, Siyəzən şəhərində yerləşən “Siyəzən Broyler” ASC-nin satış nümayəndəsi vəzifəsində işləyib. O, 2017-2020-ci illərdə Bakı şəhəri, Qaradağ rayonu, Lökbatan qəsəbəsi, Lökbatan-Xocəsən şosesində yerləşən “Meyvəli” ticarət bazarında olan anbarından 549 min 181,49 manat dəyərində toyuq məhsullarını satış nümayəndəsi olaraq mağazalara vermək üçün qəbul edib. Sonra təqsirləndirilən şəxs malları müxtəlif ticarət obyektlərinə təhvil verərək toyuq məhsullarının satışından işlədiyi müddətdə, müxtəlif tarixlərdə hissə-hissə toplanmış 549 min 181,49 manatın 540 min 429,49 manatını şirkətin xəzinəsinə mədaxil etsə də, qeyd edilən müddət ərzində vahid niyyətlə 8 min 752 manatı ASC-nin kassasına mədaxil etməyərək mənimsəyib.
Audit dövründə təqsirləndirilən şəxs tərəfindən borcunun 3124 manatı ödənilib.
Zərərçəkmişin nümayəndəsi məhkəmə iclasında ərizə təqdim edərək M.M. tərəfindən şirkətə dəymiş ziyanın ödənildiyini və ona qarşı şikayət və tələblərinin olmadığını göstərib.
