Şimal Ərazi Baş Gömrük İdarəsinin Şirvanlı Gömrük Postunun əməkdaşı həbs olunub. Bu barədə ShimalNews 27 yanvar tarixində Baş Prokurorluğa istinadən məlumat verir.
Korrupsiyaya qarşı Mübarizə Baş İdarəsi tərəfindən Dövlət Gömrük Komitəsi (DGK) ilə birgə əməliyyat-axtarış tədbirləri keçirilib.
Nəticədə DGK-nın əməkdaşı Cavid Məmmədovun rüşvət almasına əsaslı şübhələr yaranıb. O, postda yoxlama tədbirlərinin səthi və sürətli aparılması, vətəndaşlara dəfələrlə müxtəlif məbləğlərdə pul vəsaitlərini üzərində gizlədib bəyan etmədən Rusiyaya qanunsuz keçirilməsinə köməklik etməsində günahlandırılır.
Qeyd olunan faktlar üzrə cinayət işləri başlanıb. Cavid Məmmədov barəsində məhkəmənin qərarı ilə həbs qətimkan tədbiri seçilib.
