1990-cı il yanvarın 19-dan 20-nə ötən gecə SSRİ Müdafiə Nazirliyi və Daxili İşlər Nazirliyinin qoşun hissələri Bakıya və Azərbaycanın bir neçə rayonuna yeridilib, dinc əhali müxtəlif tipli silahlardan atəşə tutularaq qətlə yetirilib.
Qətlə yetirilənlərdən çoxu xüsusi amansızlıqla öldürülüb.
Həmin gecə Sovet rəhbərliyinin əmri ilə Azərbaycan xalqına qarşı düşmənçilik hissləri ilə silahlanmış 65 minlik hərbi qüvvə, xüsusilə erməni mənşəli əsgər və zabitlər heç bir xəbərdarlıq edilmədən beş istiqamətdən şəhərə daxil oldular. Tanklar və zirehli maşınlar qarşılarına çıxan avtomobilləri, insanları əzib keçir, fərqinə varmadan hər kəsi atəşə tuturdular. Yanvarın 20-də və sonrakı bir neçə gündə Bakı və regionlarda ümumilikdə 147 nəfər qətlə yetirildi, 744 nəfər yaralandı, 800-dən çox insan həbs olundu.
Qətlə yetirilənlər sırasında milislər, fəhlələr, tələbələr, şagirdlər də olub.
Öldürülənlərdən 106 nəfər azərbaycanlı, 6 nəfər rus, 3 nəfər yəhudi, 2 nəfər isə tatar milliyyətinə mənsub idi.
Shimal.News xəbər verir ki, faciə qurbanları arasında şimal bölgəmizdən də şəhidlər var.
Abdullayev Zahid Abdulla oğlu 1959-cu ildə Xaçmaz rayonunda anadan olub. Maşınqayırma zavodunda fəhlə idi. Həmin zavodda işləyən Z. Abdullayeva ilə evlənmişdi. 2 oğlu, 1 qızı var idi. Kirayədə yaşayırdılar. Yanvarın 19-dan 20-nə ötən gecə Salyan Kazarmasının yanında avtobusun atəşə tutulması nəticəsində Zahid Abdullayev başından aldığı güllədən həlak olub. O, Xaçmaz rayonunda dəfn olunub.
Qeybullayev Elçin Suyəddin oğlu 1968-ci ildə Quba rayonunda anadan olub. 20 №-li inşaat idarəsində fəhlə işləyib. Yanvarın 19-u saat 23:00 radələrində evdən çıxıb, Salyan Kazarmasının yanına gedib. Yanvarın 21-də qardaşı İlqar Qeybullayev onun meyitini morqdan tapıb. O, Quba rayonunda dəfn olunub.
Hüseynov Rahib Məmməd oğlu 1939-cu ildə Quba rayonunda anadan olub. Ticarət işçisi idi. Evli idi. Fevralın 12-də saat 16:30 radələrində "Xəzər" Kinoteatrının yaxınlığında avtomobilə minib və Salyan qışlasının yaxınlığında avtomobildən düşərkən güllələnib. Şəhid, Quba rayonunda dəfn olunub.
Səfərov Bafadar Ağamirzə oğlu 1923-cü ildə Xızı rayonunda anadan olub. İdarə etdiyi maşınla Qarayev adına xəstəxanaya nəvəsinin yanına gedən zaman yolda hərbçilər tərəfindən güllələnib, aldığı güllə yarasından hadisə yerindəcə vəfat edib.
İsrayılov Ağanəzər Araz oğlu 1960-cı ildə Şamaxı rayonunda anadan olub, milis leytenantı idi. Yanvarın 19-da səhər tezdən işə çağırılıb. Yanvarın 20-də səhər saat 07:15-də onların maşını Tbilisi prospekti yaxınlığında atəşə tutulub. Güllə yarası alan Ağanəzər İsrayılov 4 saatdan sonra xəstəxanada vəfat edib. O, Şamaxı rayonunda dəfn olunub.
Məmmədov Vidadi Üzeyir oğlu 1949-cu ildə Şamaxı şəhərində anadan olub. Cənubi Xəzər Balıqçılıq hövzəsi idarəsində baş mühəndis işləyib. Evli və 2 uşaq atası idi. Yanvarın 19-dan 20-nə keçən gecə XI Qızıl Ordu meydanında (indiki 20 Yanvar dairəsi) güllələnib. Yanvarın 21-də xəstəxanadan meyiti tapılıb. Şamaxı şəhərində dəfn olunub.
