Quba-Xaçmaz Regional Təhsil İdarəsi əvvəlki illərdə ümumi təhsil müəssisələrində oxuyub, ümumi orta və tam orta təhsil səviyyəsini bitirə bilməyən şəxslər üçün yanvarın 26-da eksternat qaydada imtahan təşkil edəcək.
Shimal.News xəbər verir ki, eksternat qaydada aralıq imtahanlarında Quba-Xaçmaz Regional Təhsil İdarəsinin tabeliyində fəaliyyət göstərən təhsil müəssisələrində əvvəlki illərdə təhsil almış, lakin ümumi orta və ya tam orta təhsil səviyyəsini başa vura bilməyən, müraciət edərək qeydiyyatdan keçmiş şəxslər iştirak edəcəklər.
Quba şəhəri Azad Məmmədov adına 2 nömrəli təbiət fənləri təmayüllü məktəb-liseyində (Ünvan: Quba şəhəri, Əliqulu Nərimanov küçəsi) keçiriləcək imtahan saat 11:00-da başlayacaq.
İmtahana gələcək vətəndaşlar 10:00-dan gec olmayaraq imtahan keçiriləcək ünvanda olmalıdır. Şəxsiyyət vəsiqəsini özü ilə gətirməyən eksternlər imtahana buraxılmayacaq.
Aralıq imtahanda uğur qazanmış eksternlər ümumi orta və tam orta təhsil haqqında sənəd (attestat) almaq üçün Dövlət İmtahan Mərkəzi tərəfindən ümumi və tam orta təhsil səviyyəsi üzrə keçirilən buraxılış imtahanlarında iştirak etmək hüququ qazanacaqlar.
Əlavə sualı olanlar Quba-Xaçmaz Regional Təhsil İdarəsinin “146-1-7” Çağrı mərkəzinə zəng edərək ətraflı məlumat ala bilərlər.
Qeyd edək ki, qeydiyyat müddətində imtahanda iştirak üçün ümumi orta təhsil sənədi (IX) üzrə 123, tam orta təhsil sənədi (XI) üzrə 404 nəfər, ümumilikdə isə 527 nəfər ərizə ilə müraciət edib.
