Xaçmazda yerləşən “Müqəddəs möcüzəvi Nikolay” pravoslav kilsəsində Milad bayramı qeyd olunub. Bu barədə ShimalNews 7 yanvar tarixində Azərtac-a istinadən məlumat verir.
Şimal rayonlarında yaşayan xristian icmasının üzvləri kilsəyə gələrək dini ayinlər icra ediblər. Bayramla əlaqədar əvvəlcədən hazırlıq görülüb və şirniyyatlar bişirilib.
Mərasimdə Prezident İlham Əliyevin Azərbaycanın pravoslav xristian icmasına ünvanladığı bayram təbriki oxunub. Vurğulanıb ki, Azərbaycanda qeyd olunan Milad bayramı özündə yeniliyi, əmin-amanlığı, mərhəmət və şəfqət duyğularının təntənəsini təcəssüm etdirir.
Kilsənin baş keşişi, ieromonax Qeorqiy Budaqov bildirib ki, İsa Peyğəmbərin mübarək mövludu ilə əlamətdar olan Milad bayramı hər il yüksək səviyyədə keçirilir.
Dini ayinlərin icrasından sonra bayram şirniyyatları paylanılıb.
“Müqəddəs möcüzəvi Nikolay” pravoslav kilsəsi 1946-cı ildən Xaçmazda fəaliyyət göstərir.
[caption id="attachment_34703" align="alignnone" width="640"]
Foto Azertac[/caption]
