Rayon və kəndlərdə uşaq əyləncə mərkəzlərinin olmaması, uşaqların fiziki və sosial inkişafını mənfi təsir edir. Bu, onların psixoloji və emosional gerilik yaşamasına səbəb ola bilər. Sosial bacarıqların zəif inkişafı, uşaqda təcrid və həddindən artıq stressə, həmçinin fiziki aktivliyin azlığı nəticəsində piylənmə (obezite), ürək-damar xəstəlikləri kimi sağlamlıq problemlərinə də yol aça bilər. Bu cür əyləncə imkanlarının olmaması, uzun müddətdə uşaqların ümumi inkişafını ləngidərək, cəmiyyətin gələcək nəsillərini də mənfi şəkildə təsirləndirə bilər.
Bəs şimal bölgəsində uşaqlar üçün kifayət qədər əyləncə mərkəzləri var?
Gənclər əylənmək və səmərəli vaxt keçirmək üçün haralara gedir?
Shimal.News qeyd edilən suallarla yerli sakinlərə müraciət edib. Cavablar isə regionda vəziyyətin heç də ürəkaçan olmadığını göstərir.
Xaçmazda uşaqların əylənməsi üçün şəraitin olmaması sakinlər tərəfindən narahatlıqla qarşılanır. Mövcud olan karusellər və əyləncə vasitələri ödənişlidir, bu isə bir çox ailənin sosial durumuna görə çətinlik yaşadır.
Qubalı sakinlər də uşaqlar üçün əyləncə mərkəzlərinin olmamasından şikayət edirlər. Onların sözlərinə görə, rayonun mərkəzində uşaqların vaxtlarını səmərəli və əyləncəli keçirmələri üçün heç bir uyğun şərait yoxdur: “Olan karusellər isə köhnə və ödənişlidir. Uşaqlarımızın inkişafı üçün belə yerlər vacibdir. Əgər onlar öz yaşlarına uyğun əyləncə və oyun imkanları əldə edə bilməsələr, nəyə ümid edək? Əyləncə mərkəzlərinin qıtlığı səbəbindən bəzən valideynlər uşaqlarını uzaq rayonlara, ya da paytaxt Bakıya aparırlar”.
İsmayıllı da belə problemlə üz-üzə qalan rayonlardan biridir. Rayon sakinləri bildirirlər ki, parklar yararsız haldadır və uşaqları aparmağa risk etmirlər: “Əksər parklarda bütün avadanlıqlar qırıq-qırıqdır və hər an hər şey ola bilər”.
Digər rayonların sakinləri də oxşar problemdən əziyyət çəkirlər. Uşaqlar və gənclərin istirahəti üçün boulinq zallarının, kinoteatrların, pulsuz stadionların, oyun zallarının olmasını istəyirlər.
Qeyd edək ki, rayon və kəndlərdə uşaq əyləncə mərkəzlərinin yaradılması, iqtisadi inkişafı stimullaşdırır və əhalinin yaşayış səviyyəsini yüksəldir. İlk növbədə, bu mərkəzlər yeni iş yerləri yaradır, həmçinin yerli xidmət sahələrini canlandırır. Uşaq əyləncə mərkəzlərinə gələn ailələr yerli restoranlar, mağazalar və digər xidmət sahələrində alış-veriş edərək iqtisadiyyata töhfə verir. Bundan başqa, belə mərkəzlər turizmi təşviq edərək, bölgəyə xarici və yerli turistlərin cəlb olunmasına da şərait yaradır.
